Уран зургийн галерейн  бүтээлийг галаас аварч байсан залууг хүчнийхэн баривчилж явсан талаар бид өмнө нь мэдээлж байсан. Тус иргэнийг 3 хоног барьж, саатуулаад зодож гэмтээсний эцэст суллаж тавьжээ.  Манай сэтгүүлч тэр иргэнтэй уулзаж мэдээлэл бэлтгэсэн байна.

Онц байдал тогтоосны дагуу арилжааны телевиз, FM радионууд бүгд үйл ажиллагаагаа түр зогсоогоод байгаа.

Гэвч иргэдийн мэдээлэл олж авах, үзэл бодлоо илэрхийлэх эрхийг ийнхүү хязгаарлах шаардлага байгаагүй гэж иргэний нийгмийн байгууллагууд үзжээ.

Жагсаал үймээний хохиролд бухимдсан нийслэлд амьдрал үргэлжилсээр байна. Хүмүүс талхаа авч иддэгээрээ идэж, машиндаа шатахуунаа авч хийсээр л байна.

Харин өглөө босоод иддэг талх, машинтайгаа хөдлөөд хийдэг шатахууных нь үнэ нэмэгдсэн байгаад иргэд бухимдаж байна. Талх, шатахууны үнийн талаарх мэдээг танд хүргэе.

Өнөөдөр 15 цагийн үед Нарантуул захын өмнөх төмөр зам дээр галт тэргэнд хүн дайруулж амь насаа алджээ. Осолд өртсөн хохирогчийн хэн байсныг мөрдөн байцаах ажиллагаагаар тогтоохоор ажиллаж байна.

         Ийгл телевиз байгуулагдсан цагаасаа хойш улс оронд хийгээд дэлхий ертөнцөд болж байгаа үйл явдлыг бодит үнэнээр нь үзэгчдэдээ шуурхай хүргэсээр ирсэн билээ.

        2008 оны 7 сарын 1-ний өдөр болсон эсэргүүцлийн жагсаал цуглаан, үүссэн хямралт байдлыг шууд шуурхай дамжуулах үүргээ ч биелүүлсэн. Ингэхдээ сэтгүүлзүйн мэргэжлийн үнэ цэнэ, ач холбогдлыг гүнээ ухамсарлаж, мэргэжлийн өндөр түвшинд, тэнцвэртэй, бодитой, тодорхой байх хэм хэмжээнд мэдээллийг шуурхай хүргэхийг зорьж ажилласан юм.

        Урьд өмнө болж байгаагүй энэ эрсдэлт үйл явдлын үеэр устаж үгүй болсон, эвдэрч сүйтгэгдсэн соёлын өвийг нөхөн сэргээх, сэргээн засварлах ажилд Ийгл телевизийн хамт олон зохих хувь нэмрээ оруулах болно гэдгээ мэдэгдэж байна.

        Ийгл телевиз Монгол улсад хараат бус, ардчилсан сэтгүүлзүйг хөгжүүлэх үйлст чин шударгаар хичээнгүйлэн зүтгэж, зөвхөн үнэнийг олж мэдэх эрхтэй үзэгчдийнхээ эрх ашгийг дээдлэн ажиллах болно.

        Бид иргэдийн үзэл бодлоо илэрхийлэх эрх чөлөөг хүндэтгэн дээдэлж, аливаа нам, улс төрийн хүчнээс хараат бус, гагцхүү ард иргэдийн дуу хоолой, индэр байхыг ямагт эрхэмлэж, хүний эрхийн үндсэн зарчим, Монгол улсын Үндсэн хуулиар олгогдсон эрхийнхээ дагуу бодит мэдээллээр хангагдах эрхийг иргэддээ олгох үндсэн үүрэг хүлээсэн мэдээллийн байгууллагын хувьд энэ үүргээ биелүүлсээр ирсэн, цаашид ч үүргээ ухамсарлан чармайн ажиллах болно.

Ийгл Телевизийн Гүйцэтгэх Захирал Б.Баярсайхан

Анх удаагаа онц байдал зарласан 4 хоногийн хугацаанд монголчууд архигүй 4 хонов. Шөнийн хотын гудамжаар хөлчүү холхидог залуус энэ өдрүүдэд  байсангүй.

Архигүй амгалан хоносон 4 хоногийн хугацаанд гэмт хэргийн тоо ч багассан байна.

7 сарын нэгэнд болсон үймээн самууны үеэр бэртэж гэмтсэн зарим иргэдийг гэмтэлийн эмнэлэгт хүргүүлсэн билээ.

Хүнд болон хөнгөн гэмтэлтэй иргэдэд түргэн шуурхай эмчилгээ хийсэний үр дүнд өнөөдрийн байдлаар нийт ирсэн иргэдээс 11 өвчтөн үлдээд байгаа юм байна.

Дунд сургуулийн хүүхдийн амралт эхлээд сар гаруйн хугацаа өнгөрч байна. Хүүхдүүд амралтаа хэрхэн өнгөрөөж байгаа талаар бид сонирхосон юм.